Monday 20 January 2020

உயிருதிர்காலம் !


நதியலைபோல
அசைந்து கொண்டேயிருந்தது
பெருங்கனவு !


துரத்திக்கொண்டு ஓடும்
அகாலமான நேரத்தை
துரத்திக்கொண்டு போகிறது சாமம் !

ஒவ்வொரு முறை மூழ்கும் போதும்
அதன் ஆழத்தில்
அடைபட்டுக்கிடக்குமோர்
உறக்கத்தை வைக்கிறேன் !

நதியையே
தடயமில்லாமல் தின்றுவிட்டுப் போய்விட்டது
இரவு !

*

மிதமிஞ்சிய உணர்வூட்டல்
ஒருகாலத்தை
தங்களுடன் கொண்டுவருவது !


விடுபட்டுப்போன
அதிர்வலைகளைப் பின்தொடர்கிறார்கள்
புத்திசாலிகள் !



பல கோணங்களில்
விநோதமான மொழி
மேதாவித்தனமாக
உரையாடுவதிலிருந்து மாறுபட்டு !


உணர்வுநிலையில்
வித்தியாசமாக விலகி
தன்னிலை மறக்க
விதியில் அதிக நம்பிக்கை !


நெருக்கமாகும்
மனப்போக்கு இல்லாத
கிறுக்குத்தனமான மனப்பிரமை !


அதைத் தொடர்ந்து
அளப்பெரிய ஏமாற்றம் !


வெற்றிடத்தை நிரப்ப
அலைந்துகொண்டிருக்கிறார்கள்
கனவுகளை தேடி !


*

கொஞ்சம்போல
அநாமதேயங்களைப் பின்தொடரத்தெரியும். 


மீண்டும் மீண்டும் முயற்சி செய்ய
அதன் மீது வெறியேதும் கிடையாது !


பழக்கமான நடைபாதையில்  

ஏராளமான சனக்கூட்டமென்று வைத்துக்கொள்ளுங்கள் 


விரக்தியான ஆரம்பத்தில்
காற்றோடு பூங்காவனப்பாதையில்ப் போகநினைக்கிறீங்கள் .


விருப்பமில்லாத திருப்பம்
ஏரிக்கரைப் பக்கம் போகச்சொன்னால்
என்ன செய்வீர்கள் ?”


மற்றொருநாள் 

திக்கில் திணறிக்கொண்டிருக்கும்
நெரிசலிலிருந்து காப்பாற்ற


மற்றொருநாள்
வனாந்திரங்கள் பூதாகாரமாக நிற்கிற
இன்னொரு புதுத் திசையில்ப் போகச் சொல்ல!


இதுபோன்ற நாட்களித்தான்
வழிகள் வக்கிரப்படுத்தப்படுகின்றன !


கூட்டிக் கழித்துப் பார்த்தால்
இலக்கின்றிக் கூட்டிச் செல்லுகிறது என்பதைப் பற்றி
அதிகம் கவலையில்லை !


முழுசா நம்பாத போதும்
நம் மீது கோபித்துக்கொள்வதில்லை !


ஒழுங்குபடுத்தப்படாத பயணங்களோடும்
இடையீடு செய்வதில்லை !


புதியபாதைகள்
ஒருவித அனுமானத்தோடு
பொறுமையாகத் தம் வழியில் சென்றுமுடிகின்றன .


*

கண்ணாடிகளை முன்னிறுத்தும்போது
எனக்குரிய
அடையாளங்கண்டுபிடிக்க முடியாமல்
தேடித்திணறவேண்டியிருக்கு !


உற்றுநோக்கிக்கொள்ளும் போதெல்லாம்

என் தோற்றத்துடன் கலவரமாகி
இடைச்செருகும் விம்பங்களும்
புரிதலுக்கு அப்பாலானதாகவேயிருக்கின்றன !


என் பிரதிபலிப்பு
பேரழிவைக்கொடுப்பதுபோலிருந்தாலும்
சடுதியான கணப்பொழுதில்
கலைத்துப்போடுவதில் உடன்பாடுகளில்லை !


என்னை முழுமையாகக் கலந்திருக்கிறது
பாதரசம் பதிவுசெய்யும்
நேரடித்தன்மையான உருவம் !


ஆழமாகக்காயப்படுத்துகிறது
இமைகளுக்கடியில் கருவளையங்கள் ,


இரக்கம்தேடும் பொழுதுகளில்
எதற்காக ஏங்கவைக்கும் முகச்சுசுளிப்புக்கள் !


என்னதான் நடக்கிறது ?


இவ்வளவுக்கும்
என்னை நன்றாகப் புரிந்துகொள்ளும்
என்னைத்தானே பார்த்துக்கொண்டிருக்கிறேன் !


*

பின்னணியில்
முன்னோடியான ஆதிமனிதனின்
ஏதோவொரு அனுபவம் இருக்கவேண்டும் !


ரெண்டுவிதமாக
சட்டென்று மாறிவிடுகிறேன் !


ஒருமுகத்தில்
தாடியைத் தடவிவிட்டு
கண்களைச் செருகிவைத்து
வார்தைகளை உதறிவிடும்போது
உதடுகள் உள்நோக்கி மடித்துகொள்கின்றன !


இன்னொரு முகத்தில்
அசுமாத்தம் ஏதுமிலாதபோதும்
பின்னடைந்த குற்றவுணர்ச்சிகள்
நினைவுகளின் நிலவறைக்குள்
நுழைந்து கொள்கின்றன ! 


ரெண்டுமுகத்தையும் நானாகப் பார்த்ததில்லை !!


கோணல் சிரிப்போடு யாரெல்லாமோ
அசாதாரணமான குரலில்
வியாக்கியாணங்கள் கொடுத்துவிட்டுப்போகிறார்கள் !


நானும்
எதையும் அலட்டிகொள்ளாத
நானும்
மட்டும் எஞ்சியிருகிறோம் !


*

தற்செயலாக
உள்ளங்கையையும்
ஒழுங்கற்ற கேந்திரகணிதத்தில்
தடவரைவுக் கோடுகளையும்
வேடிக்கைதான் பார்த்துக் கொண்டிருந்தேன் !


எப்பவோ நடந்து போன
ஒற்றையடிப்பாதைகள் போலிருந்தன திருப்பங்கள் !


பள்ளத்தாக்குகளில்
திகட்டத் திகட்ட
வயதானதைப் பதிவுசெய்துவைத்திருந்தது
வற்றிப்போன நதி வளைவுகள் !


மூழ்கி முத்தமிடுகின்றன
இன்னமும் ஓடிக்கொண்டிருக்கும்
சிற்றோடைகள் ! 


விரல்களை அகலத் திறக்கும் போது
தமக்குளே அந்நியமாகி
விறைப்பான சுருக்கங்கள் மறைந்து கொண்டன !


ராசியில்லாத சூரியமேட்டுக்கும்
அழிவுபோன்ற ஆயுள்ரேகைக்கும்
ஏதோ ஓர் இடைவெளியில்
குறுக்க மறைத்து வரையப்படிருக்கலாம்
ரகசிய விதிகள் ! 


காலக்கதவைத் தட்டும் தடங்களுக்குள்
வேறு என்னவெல்லாம் இருக்கலாம் ?.


இதுக்குமேலும்
அகழ்ஆய்வு செய்துகொள்ள விரும்புவில்லை !


*

காலப்போக்கில்
விமர்சனங்களை உதறியெறிந்துவிட்டு
மனச்சலிப்புக்குள்
காணாமல்ப் போய்விடுகின்றன
எல்லா விவாதங்களும் !


ஏதோவொரு காரணத்தோடே
எதிர்பார்ப்புக்களைப்
போதையேற்ற ஆரம்பிக்கின்றன
உரையாடல்கள் !


எதைப் பாராட்ட வேண்டுமென்று
நேச நரம்புகள்
விழித்தெழும் கணத்தில்
வறட்டுத்தனமாகிவிடுகிறது புரிதல் !


தேன்மொழியில்
நன்றிகளை எதிர்பார்த்தே
பிரியமாகக் கடந்துகொண்டு போகின்றன
பரஸ்பர பரிமாற்றங்கள் !


கண்களை மூடிவிட்டு
இருதயத்துக்குள் ஊடுருவிச்சென்று
எதார்த்தமா? பகல்க்கனவா ? என்பதுக்குள்
இளைப்பாறிவிடுகிறது காலம் !


முடிவிலியிலும்
அபூர்வமாகவே இருக்கிறது

 " சிலநேரம் தவறாகவிருக்கலாம் " என்று 
மென்றுவிழுங்கிச் சொல்லாமல்
நிறுவமுடியாத முடிவுகள் !


*

முகபாவங்களில்
குழந்தைகள்
கும்மாளமாகிறார்கள் !


ஒன்றுமே புரியவில்லை
ஒலியின் விதத்தை

அடிப்படையாகவைத்தபோது !


பின்புலத்தில் நின்றபடி
உரையாடலை ஒட்டுக் கேட்கிறேன் ,


சந்தேகமாக
கீழ் நோக்கிய பார்வையால்
ஒருவரை ஒருவர் உஷ் என்று
மௌனமாக எச்சரிகிறார்கள் !


அதன்பின்னர்
கலக்கமில்லாத கணங்களில்
ஒற்றை வரியில் வசனங்கள்
கூடுதலாகவே அற்புதமாகவிருந்தது !


வளர்ந்தவர்கள் போல
இறுக்கத்தை எகிறி
பற்றி எரிய வேண்டுமென்றும்,


பதில்களைக் கேலிசெய்து
அழுத்த உடைந்துபோக வேண்டுமென்றும்,


பெருமூச்சு விட்டபடி
உணர்ச்சி நொறுங்க வேண்டுமென்றும்
எதுவுமில்லை ,


ஒருவேளை
அவர்களின் மொழியில்
வார்த்தைகளின் வேறுபாடு
உச்சரிப்பைப் பொறுத்துத் தீர்மானிக்கப்படுவதில்லை.!


*


சபிக்கப்பட்ட அதிகாலையே
சிலரை மட்டுமே தேர்தெடுத்திருக்கிறது போல
அபூர்வமான அன்றில்ப் பிரியத்தை
அலட்சிய முகத்தில்
சிதறியடித்துவிட்டுச்செல்கிறது

மழை !



இருக்கத்தான் செய்கிறது
நிலைப்படுத்தவென்று
ஒவ்வொரு நிமிடப் பகுப்பிலும்
சில பழைய ஞாபகங்கள் !


மர்ம வலையில் சிக்கிய
விபரீத எண்ணப்போக்கு
கொண்டுவந்து விட்டுசெல்வதிலெல்லாம்
நினைவின் நிழல் !


மனது பாழடைந்து கிடப்பது பற்றியும்,
நாட்கள் நடக்கும் விதம் பற்றியும்
ஏற்கெனவே
நீண்ட குறை சொல்லியாயிற்று. !


செம்மஞ்சள்களின் மீதேறி
கடந்து களைத்த சோலையோரங்களை
காலடியிலயே வைத்துவிட்டு
வந்தவழியே திரும்பிச் செல்கிறேன் !


*


அசைத்துக்கொண்டே
உதிரமறுக்கும் இலைக்காம்புகளை
அவசராமாக ஈரமாக்கி வைக்கிறது

அருகிலிருக்கும் காற்று !

நழுவும் நுனியிலிருந்து
மீளவும் துளிர்கின்ற நினைப்பில்
இன்னும்சில தளிர்கள் !

மல்லாந்தவாக்கில் கிறங்கிக்கிடக்கும்
சருகுகளை
ஆடையாக அணிந்திருந்த போதும்
அழகாகத்தானிருந்தது நிலம் !

ஒவ்வொரு உள்மூச்சும்
வேற்றுத்தனமான அடர்த்திபோல
ஏதோவொண்றுக்குள் நெருக்குகிறது!

தூங்கிக்கொண்டிருந்த
தோள்ப்பட்டைத் தட்டெலும்பிலிருந்து
சென்றவருடம்போலவே
கசியத்தொடங்குகிறது
வலி !



*


வானத்தைத் தவிர
சொல்வதுக்கு வேற ஏதுமில்லை.!

காதுகளை

ஆழமாகப் புதைத்தால்
விசித்திரமான முணுமுணுப்புகள்!

சிறிது நேரம்
காற்றின் குரலிலிருந்து
தனிமைப் பிரவாகம் !

மாற்று எண்ணங்கள்
பின்தொடர்ந்து விரட்டுவதால்
திறக்கப்பார்க்க நேரமில்லை !

ஞாபகத்தை
நினைத்துக் கொண்டிருந்தபோது
ஞாபகம் வந்துவிட்டது
ஊசிக்குளிர் கருத்தரிக்கும் காலம் !



*

தளர்ந்து கொள்ள
ஒரு புகலிடத்தைத் தருவதுபோல
நேரம் தனித்திருந்தது !


எப்படி எதிர்கொண்டேனென்று
புரிந்துகொள்ளமுடியாத நேற்றுக்கள்

பிசுபிசுக்கும் சுழல்கள்போல
வந்துவந்து போய்க்கொண்டிருந்தன !


இன்றையநாள்
நுழையும் வித்தையும்
சேர்ந்தே நடக்கும் விதத்தையும்
பிரமைகள் கற்பனை செய்துகொள்கின்றன ! 


தொலைநோக்கும் கண்களில்
மூடுபனிப்போலப் படிந்திருக்கும்
நாளையென்கின்ற நிகழ்வை
இன்றே அவசரமாக அறுத்தெறிய விரும்பவில்லை !


அதை நேரில் சந்திக்கும்வரை
எதையுமே
வெளிக்காட்டிக்கொள்ளா இருப்பில்
லயித்திருப்பது பிடித்திருக்கிறது !



*


தன் வருகையை
அதிகப்பிரசங்கித்தனமாக்கிகொண்டிருக்கிறது
சுள்ளென்ற குளிர் !


நிரந்தரமான முகம் ஏதுமில்லையென்று
சலித்துக்கொள்கிறது .

காவிபடிந்த வெய்யில் !


விழுந்துகொள்ள விரும்பாத
வெளிறிளம் காம்புகளை
மிச்சமிருக்கும் வாஞ்சையுடன்
எண்ணிக்கொண்டிருக்கிறது
முதிர்கிளை !


ஓய்வெடுக்கும்
குருவிகளின் இயலிசை
கடைசித்தருணங்களில் !


இப்பவே கர்வமாகத்தான்
தலைக்கு முக்காடுபோடத்தொடங்குகிறது
முன்னிருட்டு ! 


தனக்குரிய காலத்தைக் 

 கெட்டியாகப்பிடித்துக்கொண்டு
தேக்கி வைத்திருக்கிற
உச்சக்கட்டத்தை மீட்டெடுத்துக்கொள்கிறது
இயற்கையின் பருவக் காமம் !


இனி
இலைகளின் உயிருதிர்காலம் !




வியாழக்கிழமை !

ஏவல் அழுகை
ஆழ்ந்த உறக்கம்
மெளன முணுமுணுப்பு
லேசான உரசல்
உற்றுக்கேட்க
எல்லாமுமாய் இருந்தது
மழை !


*


கொந்தளிப்பாகவும்
பெருத்த கிளர்ந்தெழுதலாகவும்
நிலைமாற்றமாகவும்
பழிதீர்த்தபடியிருக்கிறார்கள்.....

இது
எதிர்வினைகள்
மனச்சோர்வுடன் தலையசைக்கும்
காட்டுமிராண்டித்தனமான காலம் !
தண்டனைகள்
சீரழியும் முறைமைகள்
நலிவு மதிப்பீடுகள்
தோல்வியுறுவதற்கான நுணுக்கங்கள்
நீதிதேவதையிடமே கொட்டிக்கிடக்கிறது.
இருந்தும்
குற்றங்களைப் பற்றியே
உரையாடிக்கொண்டிருக்க விரும்புகிறார்கள்
ஏன் ?
அது முடிவற்றதென்பதாலா?
மதிப்பீடு செய்து
பதிலுக்கு ஆச்சரியத்துடன் பார்த்துவிட்டு
கண்டெடுத்து
ஒப்புநோக்குகையில்
பிரதியை அப்படியே உள்வாங்கி
வெறித்துவிட்டு
வெளிச்சம் விழாத மூலையொன்றில்
இருட்டாக இரு !!!!


தடுமாறாத
புதிய பயணம்தான்...
உத்தரவாதமாக வழிசொல்கிறார்கள்
பழைய நண்பர்கள் !!!
மனதின்
பழக்கதோசமாயிருக்கவேண்டும்
எச்சரிக்கையாக நடக்கின்றன
கால்கள் !


*

குறைந்தபட்சம்
பத்துத் தடவைகளாவது
பல்வேறு விதங்களாக
உருவகித்துப் பார்க்கிறேன் .

விசாரித்த துக்கத்தில்
தூக்குப்போட்டு இறந்ததுபோல
வருடங்களின் இழப்பு !

அயர்ந்துபோகிற
தூக்கக் கலக்கத்துடன்
பிரயத்தனப்படவேண்டியிருந்தது
நாள் முழுவதும் !

ஒரேயொரு முறைதான்
இரண்டே இரண்டுபேர்
பழைய முகச்சாயலில் !

*

ஒரு காலத்தை
சுமைதாங்கிய
தனித்த உலகத்தினுள்
சுரங்களின் பேராசைப் பிரவாகம்,,,,,
விதிவிலக்காகக்
கிளர்வூட்டும் உணர்ச்சிகளில்
நிரந்தரமாகப் பயனடைந்தவர்களை
நான் சந்தித்ததேயில்லை ..
உள்ளிழுத்துக் கொண்ட
அபாரமான எளிமை
மாயக்கதவுகளைத் திறந்து
கீர்த்தனங்களை
வெகுஅருகில் திகைக்கவைத்தது.
மனம்
இசையோடும்
இதம் குரலோடும்
மேம்படுத்தப்பட்ட
இணக்கத்துடன் இருக்க முடியுமா?
முடியும் என்ற அர்த்தத்தில்
இடமாற்றீடுகள்
சரியான விதத்தில்த் தள்ளாட
விலகியேபோயிருந்தேன்
என்னிலிருந்து
நான் !

*

அயர்ந்து போனேன்.
திரள்கள்
சுத்தமாக நின்றுவிட்டது.
யாருக்கும் புரியப்போவதில்லை
காத்திருந்தது
மழைக்கு மட்டும்தான்.
வேறுயாருக்காவும் இல்லை !

*

அழைப்பிக்கும்
மெல்லிய புன்னகை
நிழலசைத்துக்கொண்டிருந்தது !


எதிரொலித்த
நிமிடத்திலேயே புரிந்துபோனது
தேவதைதானென்று !


தயக்கமாக விழிகளை
உருவிவிட்ட போதெல்லாம்
இறகுகளின்
படபடப்புக்கள் மட்டுமே கேட்டன !


முடியவேமுடியவில்லை
வயதைக் கண்டுபிடிக்க
காலம் முன்னேறுவதைப்
பின்நிறுத்திப் பல வருடங்கள் ஆகிவிட்டது !


மூச்சு சத்தம்
குகையிலிருந்து வருவது போல்
பெரிதாக மேலிருந்தது.


அலைக்கழிக்கும் வரைபடத்தில்
இடம் வலமாக நகரும்
புள்ளிகளைக் கூட யாரும் சொல்லவில்லை !


சிக்கலான ஓவியமொன்றில்
தோற்றுபோனவர்களில்
நானும் ஒருவன்…,,!

*

முகம்
வெளிறிக்கொண்டிருந்தது
அமைதிப் பொழுது
துக்கிக்கும் சில நொடிகளின்
மயக்கம் !
மொத்தமாகத் திகட்டிவிடுகிறது
ஆத்மப் பெருநிழலின்
உருவகம் !


*

ஆதர்சங்கள்
பிழியப்பட்ட சக்கையாக
அமைதியாகவே இருக்கிறது
மிகச் சிறிய அறை !

பவுர்ணமியில்
முழுமையாகிய பூரிப்பைப்
பிரஸ்தாபித்தபடி முழுநிலவு
கீழே இறங்கிவந்து
ஜன்னல் முழுவதையும் ஆக்கிரமித்தது !


அசதியில் படுத்தும்
முந்தையதைக் காட்டிலும்
நன்றாகவே விழித்தெழும்ப முடிந்தது !


வெறுமைக்குள் சிக்கி
ஒரு இரவுக்குள்
பெரிய மாற்றங்களேதும் நிகழவில்லை !

*

ஒருமுறை
இன்னுமொருமுறை
இன்னுமொரேயொருமுறை
அதிஷ்டங்களை
நினைவுகூர்கையில்
வேற்று நிலைத்திருப்புகளிற்குச்
சாத்தியங்களில்லை !


*
நீண்ட வருடங்களின் முன்
நீலக் கடற்கரையில்
வெளிறிய நிர்வாணங்களை
பார்த்தும் பார்க்காமலும் நின்றிருக்கிறேன் !

இல்லை
வெளிப்படையாகச் சொன்னால்
சமாளித்துக் கொண்டேன்.!


வெளியே
அம்மணமாகவிருந்தபோது
எனக்குளே களைந்துகொண்டிருந்தது
கூச்சசுபாவம் !


பதட்டமாக நிட்பது
அந்த இடத்தில்
அதற்கு வேறதோர் அர்த்தம் !


காட்டிக்கொள்ளாமல்
இயல்பாக இருப்பது போல் நடிக்க
நிமிடங்கள் தேவைப்பட்டது.


பின்னர் பழகிவிட்டது
அன்றே பிறந்தது போல.!

*

தெரிவு முகவரிக்குள்
தீராத மனஅலைச்சல் !
எடையிழந்த காற்றென
ஒருசொல்லென
ஏதோவொரு நாதமென,
இந்த இடமென்று
சுற்றிச் சுற்றி வந்தபின்
இன்னோர் இடம் .....
ஒரு கணத்தில்
ஒன்றையொன்று வென்று
அடுத்த கணத்தில் தோற்றுக்கொண்டிருக்கின்றன
விருப்பங்கள் !

*

ஒருவிதத்தில்
பிரமைதான் போலிருக்கு
இருநிலைகளில் மாயம் காட்டி
தொலைந்து போனவனை
வாங்கிக்கொள்வது போல
நீட்டிப் புன்னகைத்துப்
பின்சாய்ந்து கொள்கிறது
பழைய நகரம்
ஆச்சரியங்கள்
ஒவ்வொரு தடவையும்
பிரகாசிக்கத் தவறவில்லை
தன்னைத் தருவதில் மட்டும்
நிகரில்லாச் சுவை
இந்த முறையும்தான்.,,,,...

*
குரல்களும்
அவர்களின் மொழியும்
முன்மொழிந்து கொண்டிருப்பவை
கடலின் மடியில்
ஆதியிருள் போல !
நான் சொன்னேனில்லையா
காற்றே அங்கே சிறைப்பட்டிருந்ததென்று !


*
மறைப்பில்லா
சல்லாபமாகவே உரையாடல் !

கண் மூடிக்கொண்டே
மழை சிதறும் துளிகளினுடே
பெருத்த சிரிப்பு !

மேகமில்லா வானத்தில்
அனிச்சைத்தனமான சத்தங்களை
விளிம்பிற்கு சற்று முன்
துல்லியமாக எதிர் வைக்கிறேன் !


தளர்வான நடையில்
குளிர்துபோன கைகளைக் குலுக்கி
சப்தரிஷி தாரகைகளைச்
சற்று நேரம் பார்த்துக்கொண்டிருந்தோம்!


உன்னிப்பாய்க்
கவனித்துகொண்டிருக்கவில்லை
அந்திசாய்தல் நிகழ்ந்தபோது !


இம்சையென்பது
தணிந்த சாம்பலில்
இறகாகவே இறங்கும்
வெம்மைக் கணங்களை
அன்றிரவே அசைபோடுவது !

*

உருப்பெரு வானம்
ஓராயிரம் நட்சத்திரங்கள்,
விசைகொண்ட பெருங்காடு
வடதுருவ விருட்சங்கள்,
நள்ளிரவு நிலவொளி
திகில்படரும் நிழல்கள்,
தூரத்து சத்தங்கள்
வெளிச்சப் புள்ளிகள் !
மேற்கொண்டு வாய்ப்பே இல்லை !
இந்த ஜன்னலையும்
பிரியவேண்டிய நேரம் !

*

பெரிதாய் சுவாரசியம் இல்லை
முணுமுணுப்புக்களை
வாரி வழங்கிக்கொண்டிருக்கும்
உதடுகளில் !


பல சமயங்களில் வராது
எதிர்பார்ப்பது
அப்படியே வந்தாலும்
எதிர்த்திசையில் அடித்துப்போய்விடும். !


வெளிறிச் சிரிக்க
வார்த்தைகளைக் கொட்டவேண்டிய
மிகச் சிறிய தீவுப்புள்ளி !


தர்மசங்கடமாக
மவுனத்தைக் கலவரப்படுத்த
ஒவ்வொரு சுழிப்பும்
பிசகில்லாமல் தெரிந்துவைத்திருக்கு !


தொடர்பில்லாத
சட்டெனப் பிடிபடாத விஷயங்களில்
ஆதர்சங்கள் இல்லை !


இதழ்களில்
இறுக்கி முத்தமிடுவது
வேறுவிதமான அனுபவம் !

*

நடைச்சுவட்டை
எழுதிக்கொண்டிருக்கிறான் ,
மெல்ல நுழைந்து
ஜன்னலோரமாக நிலையெடுத்து
பழைய வாசனைகளை
அள்ளி எடுத்துக்கொண்டது.
காலம் !


*

அற்றைக்கு
வாய்ப்பைத் தவறவிட்ட
மெல்லிய தருணங்கள்
எதைவைத்து முடிவெடுக்கப்பட்டன ?


நினைக்கத் தோன்றுகிறது
சந்தர்ப்பங்கள் பற்றி அலசியபோதெல்லாம்
வெளியேதான் நம்பிக்கை !


பின்பக்கம் இடம்மாறி
உக்கிரமாக உணர்த்திக்கொண்டிருக்கு
ஒற்றை இருப்புக்கு
ஒரேயொரு வழியில்
ஒவ்வொரு திட்டமிடலும் !


சொல்லித்தான் ஆகவேண்டும்
மொத்தமாக
உள்ளுக்குள் உடைத்துக்கொண்டிருக்கு
ஒரு மனப்போராட்டம் !

*
சட்டெனத் திறக்கப்பட்ட கதவு
பின்னிருந்து
நடுங்கியது ஆச்சரியக் கேள்வி,


முகமெல்லாம்
இயல்பாகவே இருக்கிறது.


ஆசுவாசமாகத்தான்
பதிலிலும் புன்னகைத்தாள் !


கண நேரத்தில்
மின்னி உள்வாங்கிக்கொண்டது
குரல்வளை !


பனிக் காலத்தில்
இன்னொரு பத்து நிமிடங்கள்
வேர்வையாகக் கொட்டியது !


நீண்ட தாழ்வாரத்தில்
பின்னிக்கொண்டிருக்கும் கால்களை
வேகமெடுத்து வைக்கிறேன் !.


முற்றுபெறாத ஒற்றை வாக்கியத்தில்
ஒரு அசரீரியை
நிறுத்திவைக்க முடியுமா ?

*



தொடர்விளைவுகளைக்
குறி வைத்தபடி இயங்குவது
வியாழக்கிழமை !


ஆதிமூலமாகச்
சிற்சில பிராயச்சித்தங்கள்
வேண்டிக்கொள்ளப்படுவதும்
வாரத்தின் நாலாவது தினத்திலேயே !


கீற்று வெளிச்சத்தை
சற்று குனிந்து தவிர்த்தது போலத்தான்
அந்தநாள் மனதிலிருக்கிறது !


உள்ளிழுத்துக் கொண்ட
உச்சரிப்பில்
வியாழ மாற்றத்தை
நிரூபிக்கும்படி கேட்டார்கள் !


கழுத்தறுப்பு
சங்கடமாக இருக்கவில்லை
குருபெயர்ச்சியில் கவனம் முழுவதும் !


ஒரு மின்னல் அழுத்தில்
முடியாது என்று சொல்லியிருக்கவேண்டும் !


ஆனால் சொல்லவில்லை
எப்படிச் சம்மதம் சொன்னேன்.?


அதுவும்
வழக்கமான இன்னொரு
வியாழக்கிழமையாக இருந்திருக்கவேண்டும் !




மனிதர்களென்று சொல்லிக்கொள்வதுக்கு


" நேரம் கிடைப்பதில்லை "
இந்தச் சொல்லின்மீது
எப்போதும் கவனமாயிருங்கள் !

ப்ரியமானவர்களையே
தோல்வி தழுவி
கண்ணசைவில் கடந்துபோய்விடும் ,
எந்த வாய்ப்பும் இல்லை
ஈரம் ததும்பும்
நல்லதனமானதொரு சிரிப்பை
அதன்பின்னர் அனுபவிப்பதற்கு !
ஒதுக்கி வைத்துள்ள
இதய இறகுகளின்
கதகதப்பை வெளியேற்றிவிடும் ,
முக்கியமில்லாத ஏதோவொன்று
இரக்கத்தை சம்பாதிக்கின்ற
முக்கியமான வேலையாகிறது.!
பொருட்படுத்தாதது போல
நின்று கேட்கும் வேட்கையை
விருட்டென்று பின்னிழுத்துக்கொள்ளும் !
பாசாங்கு செய்தபடி
இடறலான தருணங்களில்
பிசாசைப்போல பின்னாலிருந்து
அனைத்தையும்
நிலைகுலையச்செய்துவிடும் !!!

*
அலைந்த இடங்களை
யாரெல்லாமோ
சொந்தம் கொண்டாடுகிறார்கள் !

இது போன்ற
ஆதாரத்துடன் நிரூபிக்கமுடியாத
அவஸ்தைகள் ஏராளம் !


மீட்டெக்கவேண்டிய
காலத்தின் ஒரு பகுதி
வயது மட்டுமே !


அடிக்கடி
புதிப்பிக்கவேண்டிய
தேவைகளேதும் இருப்பதில்லை
நிறம் மங்கினாலும்
கிழிந்துபோய்விடாத நினைவுகளுக்கு !

*
ஜன்னல்க் கண்ணாடிக்குள்
எதையோ தூண்டிவிடவேண்டும் போலத்தான்
ஆடத்தொடங்கினேன் !
பாசிக்கிணறு போல
கறுத்துப்போன உதடுகள்
அதில் ஒப்பீட்டுப் பொறாமை இல்லை !
குதிரை வால்போல
நாலுமாதத் தாடி
அதில் சிறிது பெருமை தெரிகிறது !
தலைமயிர் முன்மண்டையில்
பிண்ணுக்கெல்லாம் விளையாட்டு மைதானம்
கொடுப்பினை அவ்வளவுதான் !
இலேசாக வளைந்து
பம்மிக்கொண்டு நிற்கும் மூக்கு
அதைப் பற்றிச் சிறிதும் கவலைப்படவில்லை !
கண்கள் புதைந்துபோயிருக்க
கன்னங்கள் உப்பியிருக்கின்றன .
அது ஒரு மகிழ்ச்சிநிலை !
அன்றாட வழக்கில் புழங்கும்
ஆதிவடிவம் என்னுடைய முகம் !
போட்டியிட முடியும் என்று தோன்றவில்லை
இப்போதும்
மூச்சைப் போல இறுக்கமாக
சதிராடிக்கொண்டுதானிருக்கிறேன் !
சீண்டுகின்றது
எதையோ வெளியே இழுத்துவிடுகிறதுபோல
ஒவ்வொரு அசைவும் !

*
நீங்கள்
தீர்மானிப்பதற்கு முன்னதாக
நான் முடிவெடுத்துவிடுகிறேன் ,
பிராணமாகி எனக்குள்ளே
நிலைத்ததரிசனம் கிடைப்பது போலிருந்து
நீங்களாகவே
மகோன்னதமான ஆளுமையாக
சாத்தானை விவரித்துக்கொண்டிருந்த போதில் !
உங்களுக்கு
சுயநினைவு திரும்புவத்துக்கு இடையில்
என்னை வெளியேற்றிவிடுகிறேன் !
நீங்கள் போகிறபோக்கில் கூறியது
செய்து முடிக்க ஏராளம் இருக்கிறதென்று
எனக்கோ
அடையாளம் காணக்கூடிய
சொற்களைக் கோர்ப்பதைத் தவிர ஏதுமில்லை !
நீங்கள்
மேதாவித்தனமாக வாதித்துக்கொண்டிருக்க
நானோ பழைய மதுவில்
பின்விளைவுகளோடு
வெறித்துக்கொண்டிருக்கிறேன் !
நான் முகஅடையாளம் காணமுடியாத
வெகுதூரத்தில் நிக்கும் போது
குறைந்தபட்சம்
தலைகீழாய் தெரிந்த விஷயங்களுக்கு
வியாக்கியானமளிப்பதுபோல பதறுகின்றீர்கள் !
பார்த்திங்களா
நீங்கள் அமர்க்களமாகத்தான் இயங்குகின்றீர்கள்
நான் தான்
உருப்படியாக ஏதிலுமில்லை !
ஆதலினாலாத்தான் சொல்கிறேன்
என் இருப்பு
தனித்தன்மை வாய்ந்தவொரு
புனைவாக இருக்க வேண்டும் !

*
சொல்லசைவில்
கடத்தப்பட்டுவிடுகிறது
மனசாட்சியை
ஆழக்காயப்படுத்தும் விஷயங்களும் !


வேண்டப்பட்ட சாமி
எவ்விதத்திலும் குறைவில்லாத
நம்ம சாமிதான் !


அடிமட்டத்திலிருந்து
சட்டென்று பிசகிய பின்னோட்டத்தை
சட்டென்று ஜோசித்து
சட்டென்று பின்வாங்கி
சட்டென்று அழித்துவிட்டேன் !

*

மிகப் பரிதாபமாக இருந்ததால்
நேசிப்பின் பிளவுகளை
நிரப்பிவைக்கும்
காதல்வரிகள் எழுதிவைச்சேன் !
பொக்கிஷமாக
இருட்டில் வரைந்த ஓவியத்திலும்
பொருத்தமான நிறங்களைத்
தேர்ந்தெடுத்தது !
நிஜமாகவே நம்புங்க
அமையும்போது
இதயப்பகிர்வில் பாவமேதுமில்லை !
அன்பில்த்தான்
வடிவமைப்பதையெல்லாம்
முடித்துவைத்துப் போகலாம் !
பிரேமமோகம்
சந்தேகங்களையே ஊர்ஜிதப்படுத்த
மனவழுத்தம் கூட
மரணத்தைப்பற்றிச் சிந்திப்பதில்லை !
சமயங்களில்
விருப்பம் பற்றி
மிகப் பிடித்தமான காரியமே
காதலித்துக்கொண்டிருப்பதுதான் !
பிறகெல்லாம்
மிக விநோதமான நிலையில்
நான் பரிதாபமாகவிருந்த இரவுகள்
கடவுளுக்குத் தெரியும் !
சுத்தமாக நம்ப முடியவில்லை
தன்னிச்சையாக
எப்படிக் காதலுக்குள் நுழைந்தேனென்று !
ஏனென்றால்
நான் அந்தமாதிரியான ஆள் இல்லை !

*

துண்டிக்கப்படும்
ஒரு தீர்மானத்துடன்தான்
உள் நுழைத்தேன் !


யாரையும்
குற்றம்சொல்வதற்கு
ஏதுமில்லையென்கிற கழிவிரக்கம் !


பிச்சுக்கொண்டு
காலடிகள் முந்துகின்றன
ஒற்றைப் பிளவில்
எகிறிக்குதித்து எனக்கொரு வழி !


வெளியேறும் முனையில்
ஏற்கனவே ஒருவன் !!!


இன்னொன்று தேடுவதற்கு பதில்
இங்கேயே காத்திருக்க வேண்டியதுதான்.

*
அது
முன்னொரு காலத்தை
நிகழ்வில் உள்நுழைத்து விடும் ,
இலக்கின்றி அதனுள்
நகர்பவை எதைச் சார்ந்தது என்று
வகைமைப்படுத்தப்பட முடியாது ,
நாம்
உரக்கக் கத்தமுடியாத தொனியை
உடனழைத்துக்கொண்டிருக்கும் ,
தேடி அதிலிருந்து
ஒற்றைவரி வாசிக்கும் போதெல்லாம்
ஆதங்கப்பட்டுக் கொள்ளும் !
அதன்
பிரத்தியேகமான சில வழிகள்
பேருவகை அளிப்பதாகவிருக்கும் ,
அதைப்போலவே
விழிப்புணர்வுகளையே
அடிமைகளாக்கி வைத்திருக்கும் !
அதனோடு
தீர்மானமான வரையறைகளை
சமரசம் செய்துகொள்ள முடிவதில்லை
மிகமிக முக்கியமாக
அதன் முகத்தில்
வர்மப் புள்ளிகள் இருக்கும் !
இப்ப
விஷயத்துக்கு வந்துசேரவேண்டியிருக்கு


நிறையவே இருக்கின்றன
ஒரே மூச்சில் முடிக்கமுடியாத
நாட்குறிப்பில் !

*

தொலைவில் நிட்பவர்களுக்கு
எனக்கும்
அன்பின் முகவரிக்குமுள்ள
அந்நியோன்னத்தை
அறிமுகப்படுத்துவது எப்படி ?


முடிந்தவரை சொல்லிவிட
ஒரு கவிதையை
உரிமையெடுத்துக்கொள்ளலாமா ?


எந்த இடத்தையும்
சொல்நிரப்பி வீணடிக்கவேண்டியதில்லை


நிசப்தத்தின்
ஒத்துவராத சூனிய வேடத்தில்
கவிதைகளும்
இறையாண்மையோடுதான்
உலாவிக்கொண்டிருக்கின்றன !


*

மூன்று மணி
பின்னிரவு நேரம்
கண்ணிமைகளைத்
தொடர்ந்துகொண்டிருக்க
சிற்றெழுத்துக்கள் வலியெடுத்தன !


பின்நவீனத்துவத்தின்
தனிப்பட்ட பிரஸ்தாபிப்புக்கள்
முன்னேறிய சமூகத்துடன்
உறவு கொள்ளும் மு

யற்சி !

பலசமயம்
விமர்சனங்களோடு
சுவாரஸ்யங்கள் உடன்படுவதில்லை !


கால்களை உதறி
முதுகை நீட்டுவதற்குப் பதில்
சமாந்தரமாக
மனதின் நகர்வுகளையும்
சேர்த்தே வாசித்துக்கொண்டிருந்தேன் !


கட்டுரையின் தலைப்பு
" முள்ளம்பன்றிகளின் விடுதி "

*

தேவைக்கேற்ப
விவரங்களை வாங்கிக் கொண்டு
ஆதாரங்களைச்
சேகரித்துவைக்கிறது
துயர்பகிரும் சிங்களப்பாடல் !

பின்தொடராத காதலும்
வசந்தகாலமும்
வாஞ்சையுடன் பிரிவும்
எளிதாக உள்ளீட்டும்
சுவாரசியமான முன்தீர்வுகள் !

தெரிந்த சொற்களை
ஆங்காங்கே தேடியெடுத்துக்கொண்டு
ஒரு மாலைப்பொழுது !
எல்லாக் காலத்திலும்
சமநிலையில்
எவ்விதத்திலும் குறைவில்லாத
சாதகக் குரல் !
விஷயங்களை எளிதாக்குகிறது
ஸ்வர ரசிப்பிலுள்ள
இசையின் திசை !
இன்னும் நன்றாக இருந்திருக்கும்
சகோதர மொழி
ஒட்டுமொத்தமாகப் புரிந்திருந்திருந்தால் !

*

திணித்துக்
காத்துநிற்க நேரிட்டாலும்
இருப்பைக் கண்டுகொள்ளாமல்
திரும்பிக்கொள்கிற குறியீடு
முகம் !


தவிர்க்க இயலாதபடி
ஒருகாலத்தில்
முன்கோபம்
மூக்கில் உக்காந்திருந்தது !


பந்தயம் கட்டி
வெருட்டுறதுக்கும்
இப்போது அது இல்லை.!


தள்ளாடிய நடையில்
விலத்திவைத்து நடக்கும்
அனுபவங்களின் கனதியில்த்தான்
மனதே நகர்ந்தபடியிருக்கிறது !

*
வாக்குறுதிகளில்
கற்பனை எதுவும் வேண்டாம்,

வாக்குத்தத்தங்களில்
நம்பமுடியாத ஆச்சரியங்களுமில்லை ,

கொடுத்துவைத்த
அதிஷ்டமானவைகள்
வரும்படியிலிருக்குமாயின் சேர்ந்துகொள்ளட்டும்!

கால இடைவெளிகளை
தன்னிச்சையாக நிரம்பிக்கொண்டு
மையப்புள்ளியின் சுழற்சி !

பின்வாங்கும்
தினமொன்றைக் கிழிப்பதட்கு
இன்னுமொரு தரவுப் புத்தககம் !

கிழடுதட்டிய
கனவுக் குதிரைகளின்
கால்களில் வேகம் சாத்தியப்படுவதில்லை.!

நாளைகள்
அதன் விருப்பில் வரட்டும்
சீட்டுக்குலுக்கிப்போட்டு
அதனதன் போக்கில் கடந்துபோகட்டும்

அடிமட்டத்தில்
வலிந்து எதையும் மாற்றுவதாயில்லை !

*

வாழ்க்கை  ஆழஊடுருவும் நேசிப்புகளையும்
வேறுவிதமானவொரு சூழலில்த்தான்
தேர்ந்தெடுக்கிறது,
நாங்கள்
மனிதர்களென்று
சொல்லிக்கொள்வதுக்கு !